Kahel Press Baybayin! Ating Tuklasin

Baybayin, Ating Tuklasin!

Description:

Gusto mo bang matuto magsulat gamit ang baybayin? Madali lang matutuhan ang sulat na ito!

Hayaan mong gabayan ka ng aklat na ito sa kung paano madaling matututuhang magsulat at magbasa ng baybayin, ang sinaunang sulat ng mga Tagalog. May nilalaman itong mga gabay at mga pagsasanay upang mahasa ka dito.

Mababasa rin sa librong ito ang isang maikling kasaysayan ng sulat mula sa iba’t ibang bahagi ng mundo at ang kaugnayan ng mga ito sa mga sulat sa Pilipinas. Bukod pa diyan, tinatalakay din ang kahalagahan ng katutubong sulat sa wika at kalinangan.

Ang aklat na ito ay para sa lahat ng nais matuto magsulat at magbasa ng baybayin! Halina’t ating tuklasin ang baybayin!

Author: Leo Emmanuel S. Castro

ISBN: 978-971-625-395-5

Genre: Children’s Book (Non-fiction - History, Hobbies, Guide Book)

Published: 2019

Language: Filipino

Age Recommendation: Ages 8+

Pages: 96

Author's Bio:

Si Leo Emmanuel S. Castro, o Kuya Leo, ay ang Executive Director ng Sanghabi. Siya ang pangunahing  tagapagpadaloy ng mga pandayan ng grupo. Bukod sa pagtuturo ng baybayin at Sulat Hanunuo, si  Kuya Leo rin ang pangunahing nagpapadaloy ng Pintigan na patungkol naman sa mga katutubong  instrumento ng Pilipinas. Kung siya ay di nagpapandayan, si Kuya Leo ay mahahanap sa kung saan  saan, naglalako ng mga #SulatUkitBurdaNgSanghabi at gumagawa ng mga kawayang instrumento sa  San Juan.

Foreword:

Bata pa ako, noong nag-aaral pa sa elementarya, nang ipakilala ng guro sa klase ang baybayin. Sa loob ko, bakit kaya hindi ito ginagamit sa pagtuturo sa amin? Tumatak ito sa akin. Kaya naman noong ako’y naging isa nang mananaliksik ng kultura, ginamit ko ang baybayin sa pagbuo ng isang metodolohiya sa pag-aaral ng kultura.

Mahalaga ang Baybayin, Ating Tuklasin na isang akdang pambata na nagtuturo ng baybayin. ‘Di lamang sulat ang itinuturo nito, kasama na rin dito ang maikling kasaysayan ng sulat at kung bakit mahalaga ito bilang salamin ng wika at kultura. Sa aking pag-aaral sa Quiapo, ginamit ko ang baybayin sa pagbuo ng pag-aaral ng ating kultura na tinawag kong “Pamamaraang Ka.” Tulad ng baybayin “Ka” na nagpapakita ng dalawang daloy na pinag-ugnay sa gitna, pinag-ugnay ko ang KAsaysayan, KAranasan, KAtaalan, at KAhulugan bilang pamamaraang angkop sa pag-aaral ng ating kultura. Magkakasama kami nina Reimon (Cosare), Shirley (Libre), Leo (Emmanuel Castro), Melissa (Cardenas), at Orlan (de Guzman) sa Quiapo na pawang may kani-kaniyang paraan ng pagsulong ng baybayin bilang gawaing pangkultura.

Bilang isang aklat pambata, sana’y magsilbi itong pinto na magbubukas sa pagkakaroon ng mga bata ng mas malawak na interes sa yaman ng kultura ng ating bayan. Sa naglathala ng aklat na ito, ang Kahel Press, at lalo na sa mga babasa at tatangkilik ng aklat.

Dios Mabalos!

Teresita B. Obusan, Ph.D. Philippine Studies

July 23, 2019